KIKOSI KAZI CHA KUNUSURU MTO RUAHA CHATOZA FAINI MASHAMBA YA MPUNGA NA SKIMU ZA UMWAGILIAJI WILAYANI MBALARI KWA UCHAFUZI WA MAZINGIRA .

Mashamba ya mpunga ya Mbarali Highland  Estates, Kapunga Rice Project, Kapunga Small Holders farm, pamoja na skimu za umwagiliaji za Mwanavala (Nguvukazi farm),  Mwashikamile pamoja na Sikimu ya Mwendamtitu zilizoko  Mbarali mkoa wa Mbeya  yametozwa faini ya jumla ya kiasi cha shilingi  120,290,000/= baada ya kukiuka sheria mbalimbali za Mazingira zilizo chini ya Baraza la Usimamizi wa Mazingira (NEMC). 

Faini hiyo inayotakiwa kulipwa ndani ya siku kumi na nne kuanzia tarehe 27 aprili 2017,  imetozwa na Kikosi  Kazi cha Kitaifa cha kuokoa Ikolojia ya Mto Ruaha Mkuu kilichoko Mkoani Mbeya kupitia kwa Mwananasheria wa NEMC- Vicent Haule ,  baada ya kugundua makosa mbalimbali ya uvunjifu wa sheria za mazingira na umwagiliaji katika Mashamba hayo wakati wa ziara ya kutembelea mashamba ya Mpunga na skimu tofauti za umwagiliaji wilayani humo.

Akiongea  na Waandishi wa Habari Mwenyekiti wa Kikosi kazi hiko cha Kitaifa  Bwana Richard Muyungi, alisema kwamba kutokana na makosa mbalimbali  yaliyokutwa katika masahamba hayo ikiwemo kutokuwa na vyeti vya ukaguzi wa Mazingira, kukiuka taratibu za umwagiliaji kwa kutoa na  kutumia maji bila ruhusa, kuweka  mifereji mikubwa ya kumwagilia mashambani pasipo kufuata sheria na kanuni zinazotakiwa, kutorekebisha miundombinu ya Umwagiliaji kwa mifereji ya kutolea maji. Mashamaba hayo yanapigwa faini kama ifuatavyo Mbarali Estates 33,000,000, Kapunga Rice Project 33,100,000/=, Kapunga Small Holders 3,000,000/=, Madibila farm Project 33,000,000. Pamoja na mashamba hayo pia zipo skimu za Umwagiliaji zilizotozwa faini ikiwepo Skimu ya Mwendamtitu  7,995,000, Mwanavala (Nguvukazi) 7,995,000/=,  Mwashikamile 2,200,000/=.

Aidha aliongeza pia mashamba ya Mwashikamile, Mwanavala(nguvu kazi) na Kapunga Small Holders, wanatakiwa kulipa  faini lakini pia baada ya kuvuna  wanatakiwa kuacha mara moja kulima tena katika mashamba hayo mpaka pale watapofuata taratibu za kupata vibali vya maji na cheti cha ukaguzi wa mazingira kutoka NEMC na Mamlaka ya Bonde la Mto Rufiji ."Kutoza faini hizi siyo kukomoa Mashamba haya ila ni kuhakikisha kuwa Wamiliki wa mashamaba makubwa ya umawagiliaji wote Nchini wanafuata taratibu na  Sheria za kimazingira katika kuendesha mashamba haya" alisema Muyungi

Kikosi kazi hiko kiko MKoani Mbeya kwa kukagua na kutembelea sehemu  mbalimbali za mashamba , skimu za umwagiliaji na pia kusikiliza maoni ya Wananchi jinsi ikiwa ni harakati za kurudisha ikolojia ya mto Ruaha.